Kom ons leer verder by Job en wees wys. In Hoofstuk 12 en 13 sien ons dat Job al die raad wat hy kry, by God gaan toets, want “(b)y God is wysheid en krag, by Hom is raad en insig” (Job 12:13). Job sê: “Maar ek wil eintlik met die Almagtige praat, ek wil my saak aan God stel” (Job 13:3).
Wanneer jy raad nodig het, hoor wat God vir jou sê. “As julle maar liewer net wou stilbly, sou dit vir julle tot wysheid gereken kon word” (Job 13:5). Partykeer praat ons te veel. Ons wil mense met ons woorde paai. Dit is egter dikwels beter om liewers stil te bly.
Kom ons toets eers alles wat ons hoor en sê aan die Woord, sodat ons weet wanneer om stil te bly, wanneer om te praat, wat om te sê en watter raad om te volg.
